አቢሲንያ ባንክን ለመዝረፍ የሞከሩ ተጠርጣሪዎች ተያዙ | ሪፖርተር Ethiopian Reporter Amharic

 

አቢሲንያ ባንክን ለመዝረፍ የሞከሩ ተጠርጣሪዎች ተያዙ

አቢሲንያ ባንክን ለመዝረፍ የሞከሩ ተጠርጣሪዎች ተያዙ

ቦሌ መድኃኔዓለም አካባቢ የሚገኘው የኢቢሲንያ ባንክ ቅርንጫፍ በስለት በማስፈራራት ዘረፋ ለመፈጸም የሞከሩ ተጠርጣሪዎች ተያዙ፡፡

ሪፖርተር በቅርንጫፍ ባንኩ ተገኝቶ ከዓይን እማኞችና ከመርማሪ ፖሊሶች ለመረዳት እንደቻለው፣ ማክሰኞ ሰኔ 5 ቀን 2010 ዓ.ም. ከምሽቱ 12፡00 ሰዓት ገደማ ወደ ባንኩ የገቡ ዘራፊዎች በስለት በማስፈራራት በባለ 50 ኪሎ ግራም ሁለት የማዳበሪያ ከረጢቶች አንደኛው ውስጥ ከ2.7 ሚሊዮን ብር በላይ በማጨቅ ዘርፈው ለመወሰር ሙከራ ቢያደርጉም፣ በአካባቢው በነበሩ ሰዎች ርብርብና በትራፊክ መጨናነቅ ሳቢያ ሊያዙ መቻላቸው ታውቋል፡፡ ተጠርጣሪዎቹ 5.58 ሚሊዮን ብር ከባንኩ ለመዝረፍ መሞከራቸው ታውቋል፡፡ 

የዓይን እማኞች ለሪፖርተር እንደተናገሩት ከሆነ፣ ተጠርጣሪዎቹ 5.58 ሚሊዮን ብር በሁለቱ ከረጢቶች ሞልተው አንደኛውን በቪትዝ መኪና ጭነው ለመጓዝ ሲሞክሩ ተይዘዋል፡፡ በማዳበሪያ ከረጢት የያዙትን ገንዘብ ጭነው ሲጓዙ ቦሌ መድኃኔዓለም አካባቢ በነበረው የትራፊክ መጨናነቅ ሳቢያ ከሁለት መኪኖች ጋር ሲጋጩ፣ በሥፍራው በነበረ ማስቲካ አዟሪ ጠቋሚነት በፖሊስ ቁጥጥር መዋላቸውን ለመረዳት ተችሏል፡፡

የቦሌ ካራማራ ፖሊስ ወንጀሉ የተፈጸመበትን የአቢሲንያ ባንክ ቅርንጫፍ ጥበቃዎችን ጨምሮ የቅርንጫፉን ኃላፊዎችና ሌሎችም ሠራተኞች በመርመር ላይ እንደሚገኝ በማስታወቅ፣ ስለወንጀሉ ዝርዝር ማብራሪያ ከመስጠት ተቆጥቧል፡፡ የአቢሲንያ ባንክ ፕሬዚዳንትና ሌሎች ኃላፊዎች ስለጉዳዩ ማብራሪያ እንዲሰጡ የተደረገው ሙከራ አልተሳካም፡፡

ከባንኩ ቅርንጫፍ ሠራተኞች ለመረዳት እንደተቻለው ግን በፖሊስ ጣቢያ በኤግዚቢትነት ተይዞ የነበረው ገንዘብ ተመላሽ መደረጉን፣ ፖሊስ ባለበት በተደረገው ቆጠራ አንዳችም ገንዘብ እንዳልጠፋም ተረጋግጧል፡፡ በቆጠራው ወቅት ሊዘረፍ የነበረው ገንዘብ 5.58 ሚሊዮን ብር እንደነበር ታውቋል፡፡

 

******
Filed in: AMHARIC, News Tags: 

Share This Post

Leave a Reply

Submit Comment

© 2018 Ye Dallas Radio! – የዳላስ ራዲዮ!. All rights reserved.
Site Designed by YeDallas Radio!.